Poesia di Enza Giurdanella

Poesie“’A vùçi rô vièntu”di Enza Giurdanella
“A vùçi rô vièntu mi piàçi scutàri e cu r’ìddu ògni tàntu macàri parràri”.

Fshhhhhhhhhhh…
Fshhhhhhhhhhh…

Ntâ sta stràta
nùra e sularìna
lu vièntu çiùscia
e si lamènta.

Fuòrsi è nichiàtu
pi tùttu chìddu
ca ntâ stu mùnnu
stàmu siminànnu.

Fuòrsi ni vòli rìri
ca stàmu sbagghiànnu.

Sièntu stu çiarmulìu
e scùtu piànu piànu
la sà ùçi e ’u sa lamièntu.

IU : -Pàrra vièntu…
sùgnu ccà ca ti sièntu-.

VIENTU : -Ah…! Cuàntu rulùri
ancuòntru pi li vìj:
còri ri màtri
strazziàti ri turmièntu,
ùcchi asciùtti
ca muòrunu ri fàmi
e abbrùçiunu ri sìti,
gghènti ammazzàti
pi stìrpi e riligghiùni,
uòcci çìni e
ri làcrimi ampastàti,
fratùzzi ittàti
tra ùnni ri màri,
fìgghi vinnùti,
a la dròca abbannunàti.

Ah…! Fìghhia mìa,
chi sùgnu trìsti
ntô cuntàri tùtti sti pèni
ca ’a mmiènzu a tànti stràti
truòvu.

Pàssa vùçi e
nun ti stancàri
ri crìrri
ntâ tùtti ddi cosi bèddi
ca lu mùnnu ti po’ ddàri.

Nun pèrdiri mai
la vògghia ri campàri!
Fìgghia, nun ti stancàri
ri prijàri anzièmi a mmìa
p’alluntanàri tùttu lu màli
ri stu mùnnu tùnnu,
ùnni se nun ti vàrdi
vai a fùnnu.

IU : -Çèrtu, vièntu,
ca nun mi stàncu,
e anzièmi a ttìa
vuògghiu crìrri
ntâ nu mùnnu
çiù miègghiu,
ùnni putìri stàri!

Vièni spìssu
a truàrimi,
tànti còsi bbuòni
çèrca ri cuntàri.

Ri pàçi, gghiòia
e sprànza
ti vuògghiu
sèntri parràri.

Ògni çiàntu
pròva a stutàri
pi lassàri gghiòja
ntâ ògni còri.
Çiàu Vièntu,
t’aspièttu prèstu.
Nun ti scurdàri
ri turnàri!-

VIENTU: - Çiàu figghiùzza;
òra t’àja lassàri,
picchì ’u gìru
rô mùnnu
attòrna àgghia ffàri
ma tuòrnu, tuòrnu prèstu,
nun ti scantàri!
Çiàu fìgghia mia, çiàu !-

Fshhhhhhhhhhh…
Fshhhhhhhhhhh…